Nýjar hugmyndir ?

Á laugardegi hátíðarinnar hefur skapast sú hefð að vera í Árnesi, þar sem haldinn er handverksmarkaður og einhverskonar listasýning inni í húsi, kassabílarallý og froðurennibraut úti og svo ýmislegt tilfallandi eins og matreiðslukeppni, tónlistaratriði eða annað. Ert þú með hugmynd að einhverri afþreyingu eða uppákomu sem passar inn í dagskrána þann dag? Finnst þér eitthvað vanta í þá dagskrá?

Samhliða handverksmarkaði hafa verið haldnar bæði málverkasýningar og ljósmyndasýningar, oft frá byrjendum úr nærumhverfinu – veist þú um einhvern sem er efnilegur listamaður og myndi kannski með smá hvatningu vilja halda sýningu?

Eitt af markmiðum Menningar- og æskulýðsnefndar fyrir hátíðina er að íbúar kynnist mismunandi stöðum í sveitarfélaginu. Í fyrra voru til að mynda haldnir tónleikar í skemmunni í Þrándarholti með lítið þekktum söngvara af svæðinu. Ef þú veist af efnilegum tónleikastað, þar sem gaman væri að halda tónleika eða partý eða listgjörning, væri gaman að heyra um það. Einnig væri gaman að frétta af efnilegum söngvörum eða tónlistarmönnum sem gaman væri að heyra í t.d á hlöðutónleikum.

Á þjóðhátíðardaginn, þann 17. júní höfum við haldið okkur við hátíðardagskrá, þar sem einhver ræðumaður úr sveitinni flytur hátíðarræðu, presturinn ávarpar hópinn, Fjallkonan stígur á stokk og boðið er upp á kökuhlaðborð. Myndir þú vilja sjá breytingar á þessari dagskrá? Og þá hverjar?

Opin hús eru alltaf vinsæl á hátíðinni og deginum ljósara að íbúar hafa gaman að því að heimsækja nágranna, skoða nýbyggingar sama hvernig byggingar það eru. Ert þú með ábendingu um hvaða byggingu væri gaman að fá að sjá? Ertu jafnvel nýbúinn að mála og værir til í að bjóða íbúum í heimsókn ? engin skylda að um sé að ræða fjós eða fjárhús, skemmtileg nýbýli eða sumarbústaðir, allt kemur til greina.

Er eitthvað fleira/annað sem þig langar að koma á framfæri við nefndina varðandi dagskrá hátíðarinnar?